HAVA DURUMU

- Hoşgeldiniz - Sitemizde 16 Kategoride 5661 İçerik Bulunuyor.

SON DAKİKA

TÖVBE

13 Mart 2018 - 288 views kez okunmuş
Ana Sayfa » Genel»TÖVBE
TÖVBE

Tek til ile tövbe etmek, ya da peşman olmaq yeterli degil, samimiy peşman etmektir. Çünki Allah Taalâ “Tahrim” suresiniñ 8-inci ayetinde buyura ki: “Ey, iman etkenler! Samimiy bir tövbe ile Allahqa qaytıñ. Ümüt etilir ki, Rabbiñiz sizniñ yamanlıqlarıñıznı qapatır”. Eger yapılğan hatalar insanlarğa zulum şekilinde kelse, aqqı keçkenlerden elâllıq soramaq kerek. Em de Allahnıñ nazarında tövbekâr sayılmaq içün tövbe etkende Allah rizasından ğayrı, mal ve sağlıq qaseveti kibi, faniy dünyanıñ maqsadını köz ögünde tutmamalı.,

Er bir qul azmı, çoqmı, büyükmı, ufaqmı, günah yapa. Günahsız tek Peyğamberler ve ufaq balalardır. Peyğamberlerni günahtan Allah qorçalay. Ufaq balalar ise yapqanlarını daa añlamağanları içün temizler. Yüce Rabbimiz ise günahlardan temizlenüv yolunı kösterip, bizge tövbe qapusını açtı.

Tövbeniñ qabul olması içün bazı hususlarğa diqqat etmek kerek. Birinciden, yapılğan hatanıñ farqında olmaq kerek. Yapılğan bir yaramaylıq başta insannı raatsız etse bile, defalarca tekrar yapılıp, insanğa normal körünmege başlay. Bunıñ içün eñ başta yapılacaq şey – yahşılıqnen yaramaylıqnı farq etmek. Bu meselede insan hatanıñ kimge nisbeten yapılğanına diqqat etmek kerek. İnsanğa sayısız nimetler bergen Allahqa nisbeten hatalar eñ büyük sayılmaqta. Peyğamberimiz (s.a.v.) bir müminniñ günah qarşısındaki sıqıntısını böyle ifade etken: “Mümin günahını böyle köre: “O, sanki üstüne er añ tüşe bilecek bir dağnıñ tübünde otura. “Dağ üstüme tüşermi?” – dep, qorqıp tura. Günahkâr ise günahnı burnu üstünden keçken bir çibin kibi köre” (Buhariy, “Davat” 4; Müslim 3).

Ekinciden, hatalardan sebep peşman olmaq kerek. Tek til ile tövbe etmek, ya da peşman olmaq yeterli degil, samimiy peşman etmektir. Çünki Allah Taalâ “Tahrim” suresiniñ 8-inci ayetinde buyura ki: “Ey, iman etkenler! Samimiy bir tövbe ile Allahqa qaytıñ. Ümüt etilir ki, Rabbiñiz sizniñ yamanlıqlarıñıznı qapatır“. Eger yapılğan hatalar insanlarğa zulum şekilinde kelse, aqqı keçkenlerden elâllıq soramaq kerek. Em de Allahnıñ nazarında tövbekâr sayılmaq içün tövbe etkende Allah rizasından ğayrı, mal ve sağlıq qaseveti kibi, faniy dünyanıñ maqsadını köz ögünde tutmamalı.

Tek insanlarnıñ laflarından ve ayıplamasından saqınaraq, günah işlemekni terk etmek, netice olaraq, hayırlı iş olsa da, Allah rizasını qazanmaq içün yeterli degil. Üçünciden, insannıñ onı yaramay yolğa alıp ketken müit ve arqadaşlırını deñiştirmek, yañı ve daa güzel bir müitke muracaat etmek kerek. Güzel, temiz ve bahtlı bir ömürniñ birinci şartı– salih ve sadıq kimselernen bir arada olmaqtır. Çünki Allah Taalâ böyle buyura: “Ey iman etkenler! Allahtan qorquñız ve sadıqlarnen beraber oluñız!” (“Tövbe” suresi, 9/119-ncı ayet). Demek, bir insannıñ salihlernen beraber olması onıñ da salihleşmesine sebep ola bile.

Dörtünci yerde, yapılğan günah ve hatağa bir daa qaytmamaq. Atta, o günahqa qaytara bilecek vastalarğa bile yaqınlaşmamaq. Tövbe ya küfürden, ya da günahtan temizlenmek içün yapılır. Küfürden tövbe yapqan, iman etkeniniñ tövbesi, şübesiz, qabul olunır. Günahtan tövbe etkenniñ tövbesi ise samimiyet ve peşmanlıqnen yapılğanı vaqıt qabul etilecek. Bunıñ şartı da qulnıñ tekrar o günahqa qaytmamasıdır. Hadisten belli ki, ömürinde iç günah işlemegen Peyğamberimiz (s.a.v.) künde eñ azı 70 kere tövbe etkendir (Müslim, “Zikr”, 42). Künde 100 kere tövbe etkeni aqqında da rivayet bar.

Yani Peyğamberimiz (s.a.v.) öz misalinde bizge tövbeniñ ne qadar emiyetli olğanını kösterdi. Başqa taraftan insan hata ve günahqa tüşkende ne yapması kerek olğanını da böyle belli etti: “İnsanlarnıñ er biri hata işler. Lâkin hata işlegenlerniñ eñ hayırlısı tövbe etkenidir” (Tirmiziy, “Qıyame”, 50). Buña köre, bazıda bir günahnıñ afu etilmesi içün biñ közyaş ister, bazıda ise bir tamçı közyaş biñ günahnı temizler. Eñ soñunda ise, Allah Taalânıñ tövbe qapusı er kesge, er vaqıt ve er günahnıñ afu etilmesi içün açıq olğanını unutmamaq kerek. Çünki “Zumer” suresiniñ 53-54-nci ayetlerinde qullarına, Allah rahmetiniñ kenişligine diqqat çekile, em de tezden Oña qaytmamız istenile: “Allahnıñ rahmetinden ümütiñizni kesmeñiz. Çünki Allah bütün günahlarnı bağışlay. Sizge azap kelip yetmeden evel Rabbiñizge qaytıñız, Oña teslim oluñız. Soñra sizge yardım etilmez“.

“Hidayet’ gazetası

Facebook Hesabınızla Yorum Yapabilirsiniz

İlgili Terimler :
Bilmate